ស្វាយរៀង ៖ នគរបាលការិយាល័យប្រឆាំងគ្រឿងញៀន ខេត្តស្វាយរៀងបានចាប់បញ្ជូនជនសង្ស័យជនជាតិវៀតណាម០៨នាក់ ទៅកាន់សាលាដំបូងខេត្តស្វាយរៀង ករណីជួញដូររក្សាទុកកែច្នៃ និងប្រើប្រាស់ដោយខុសច្បាប់នូវសារធាតុញៀនជាង៥៦គីឡូក្រាម នៅក្រុងស្វាយរៀង និងក្រុងបាវិត ។
បើតាមនគរបាលការិយាល័យប្រឆាំងគ្រឿងញៀនខេត្តបានអោយដឹង កាលពីរសៀលថ្ងៃទី២៨ ឧសភា ឆ្នាំ២០២៥នេះថា ដោយអនុវត្តតាមបទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ ពេជ្រ វីរ: ស្នងការនគរបាលខេត្តនិងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន ដោយមានការសម្របសម្រួលនីតិវិធីពីលោក ដូរ៉ា អង្គប្រទាន ព្រះរាជអាជ្ញារងអមសាលាដំបូងខេត្តស្វាយរៀង កាលពីថ្ងៃទី២០-២២ ខែឧសភា ឆ្នាំ២០២៥ កម្លាំងជំនាញការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យសហការជាមួយកម្លាំងអធិការដ្ឋាននគរបាលក្រុងបាវិតកម្លាំងអធិការដ្ឋាននគរបាលក្រុងស្វាយរៀងបានបើកប្រតិបត្តិការបង្ក្រាបករណីជួញដូររក្សាទុកកែច្នៃ និងប្រើប្រាស់ដោយខុសច្បាប់នូវសារធាតុញៀន ដោយបានធ្វើការឃាត់ខ្លូនជនសង្ស័យចំនួន០៨នាក់ ភេទប្រុស ជនជាតិវៀតណាម ។
ប្រភពបន្តថា ១គោលដៅក្រុងបាវិត ចាប់យកនិងដកហូតសម្ភារវត្ថតាងរួមមាន៖ សារធាតុញៀនសរុបទម្ងន់៦,២០១.៨៤ក្រាម (ជាង០៦គីឡូក្រាម) ក្នុងនោះ ថ្នាំញៀនប្រភេទកេតាមីនទម្ងន់៤,២១២.៤៥ក្រាម ថ្នាំញៀនប្រភេទមេតំហ្វេតាមីនទម្ងន់១០៦.០៦ក្រាមថ្នាំញៀនប្រភេទអ៊ិចស្តាស៊ីទម្ងន់១,៤៣៦.០៩ក្រាម ថ្នាំគ្រាប់ប្រភេទមេតំហ្វេតាមីនទម្ងន់ ៤៤៤.៦៤ក្រាម ។
ប្រភពបានបន្តទៀតថា ទីតាំងទី២គោលដៅផ្ទះជួលភូមិ ចេក សង្កាត់ ចេក ក្រុងស្វាយរៀង សមត្ថកិច្វយើងដកហូតបានសម្ភារវត្ថតាងរួមមាន (សរុបសារធារធាតុញៀនទម្ងន់៥០,៧១៨.៩៨ក្រាម(៥០គីឡូ៧១៨.៩៨ក្រាម) ក្នុងនោះ រួមមានថ្នាំញៀនប្រភេទកេតាមីនទម្ងន់៤៦គីឡូ២៩៤.១៦ក្រាម ថ្នាំញៀនប្រភេទមេតំហ្វេតាមីនទម្ងន់៥៦០.៤៣ក្រាមថ្នាំញៀនប្រភេទអ៊ិចស្តាស៊ីទម្ងន់ ៣៨៦៥.៣៩ក្រាមថ្នាំញៀនប្រភេទអ៊ិចស្តាស៊ីទម្ងន់១៣៣៧សារធាតុមិនច្បាស់ទម្ងន់៦៨៦២,៥២ក្រាមឧបករណ៍សម្ភារកែឆ្នៃរួមមាន: Extrajossចំនួន៦០ប្រអប់ទម្ងន់ ២១៦៨.៨៤ក្រាមម៉ាស៊ីនអ៊ុតមាត់ថង់០៣គ្រឿងម៉ាស៊ីនកំដៅ០២គ្រឿងចង្ក្រានអគ្គីសនី០១គ្រឿងឆ្នាំងសំរាប់លាយកូរ ០២គ្រឿងម៉ាស៊ីនÁp.01ចំនួន០២ គ្រឿង ម៉ាស៊ីនក្រឡុក ០៥គ្រឿងសារធាតុផ្សំនិងសារធាតុគីមីផ្សំជាច្រើនមុខ រថយន្ត០៤គ្រឿង ម៉ូតូ០៤គ្រឿងទូរសព្ទ័ចំនួន១០គ្រឿងព្រមទាំងឧបករណ៍ សម្ភារមួយចំនួនទៀត។
បច្ចុប្បន្ន ជនសង្ស័យរួមជាមួយវត្ថុតាងត្រូវបានបញ្ជូនទៅកាន់សាលាដំបូងខេត្ត ដើម្បីចាត់ការបន្តតាមច្បាប់រួចរាល់ហើយ ៕
