បន្ទាយមានជ័យ ៖ ក្មេងស្រីម្នាក់ចុះលាងដៃនៅមាត់អូរចៃដន្យក៏រអិលជើងធ្លាក់ចូលទឹកបាត់១យប់១ថ្ងៃហើយមកដល់ថ្ងៃទី២២ ខែឧសភា ឆ្នាំ២០២៥ ទើបរកសពឃើញនៅអូរក្រពើកល់ ក្នុងភូមិចម្ការលោក ឃុំអូរប្រាសាទ ស្រុកមង្គលបុរី ខេត្តបន្ទាមានជ័យ ។
ប្រភពព័ត៌មានបានបញ្ជាក់ថា សពក្មេងស្រីរូបនេះឈ្មោះ ពេជ្រ ហុងអុី ហៅ វិល័យ អាយុ១២ឆ្នាំ ជាសិស្ស រស់នៅក្នុងភូមិចម្ការលោក ឃុំអូរប្រាសាទ ស្រុកមង្គលបុរី ខេត្តបន្ទាមានជ័យ ។
ប្រភពបានបន្ត ថា នៅល្ងាចថ្ងៃទី២១ ខែឧសភា ឆ្នាំ២០២៥ ក្រោយពេលចេញពីរៀនគួជាមួយមិត្តភក្តិប្រុសស្រី៥នាក់ ពួកនាងបាននាំគ្នាជិះម៉ូតូទៅលេងចាប់ក្តាម ។ ដោយសារប្រឡាក់ដៃ នាងបានចុះទៅលាងដៃ ស្រាប់តែរអិលជើងធ្លាក់ចូលអូរ ហើយមិត្តភក្តិចុះជួយដែរតែជួយមិនទាន់ និងរហូតដល់ព្រលប់ទើបហ៊ានប្រាប់បងប្អូនសាច់ញាតិ នាំគ្នាមករកដល់ពាក់កណ្តាលអធ្រាត្រមិនឃើញក៏ត្រឡប់ទៅផ្ទះវិញ ។
លុះមកដល់ព្រឹកឡើងថ្ងៃទី២២ ខែឧសភា ឆ្នាំ២០២៥ កម្លាំងយោធាតំបន់ប្រតិបត្តិការសឹករងបន្ទាយមានជ័យ និងផ្នែកសឹករងស្រុកមង្គលបុរីចំនួន១០នាក់ សហការជាមួយនគរបាលប៉ុស្តិ៍ឃុំអូរប្រាសាទ និងក្រុមប្រឹក្សាឃុំ រួមជាមួយអ្នកស្រុក រាវរកបន្តទៀត ។ ការរាវរកនេះ រហូតដល់ម៉ោង១០ព្រឹក ទើបប្រទះឃើញសពនៅចម្ងាយពីកន្លែងរអិលធ្លាក់់ប្រមាណ២០ទៅ៣០ម៉ែត្រ និងស្រង់ឡើងគោកឱ្យសមត្ថកិច្ចជំនាញពិនិត្យនិងធ្វើកោសល្យវិច័យ ។
នេះជាករណីទី២ហើយនៅដើមឆ្នាំ២០២៥ ដែលមានក្មេងលង់ទឹកស្លាប់ គឺនៅភូមិចម្ការលោកលង់ទឹកអូរស្លាប់ម្នាក់ និងនៅភូមិអូរប្រាសាទលង់ទឹកស្រះស្លាប់ម្នាក់ ។ កាលពីចុងឆ្នាំ២០២៤ នៅភូមិចម្ការចេក ក៏មានករណីលង់ទឹកស្រះ៣នាក់ បណ្ដាលឲ្យស្លាប់២នាក់ និងជួយសង្គ្រោះបានម្នាក់ ៕
