ភ្នំពេញ ៖ បុរសម្នាក់ជាកម្មករកាប់ជ្រូកនៅទីសត្តឃាតមួយកន្លែងយីហោ«សត្តឃាតដ្ឋានជ្រូក ភូមិតាឡី១៦៨» ខណៈធ្វើការពេលយប់ត្រូវបានចរន្តអគ្គិសនីឆក់ បណ្ដាលឲ្យស្លា.ប់បាត់បង់ជីវិតចោលប្រពន្ធ ដែលទើបសម្រាលកូន ។
ដោយឡែក នៅក្រោយពេលកើតហេតុភ្លាមៗនោះ ក្រុមការងារនៅទីសត្តឃាតនោះបានបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្ស៊ីដែរ ប៉ុន្តែពេលទៅដល់គ្រូពេទ្យប្រាប់ថា បុរសនោះស្លាប់បាត់ហើយ ។
ហេតុការណ៍នោះបានបង្កឲ្យមានការភ្ញាក់ផ្អើល កាលពីវេលាម៉ោង៥ព្រឹក ថ្ងៃទី០៦ ខែឧសភា ឆ្នាំ២០២៥នៅ«សត្តឃាតដ្ឋានជ្រូក ភូមិតាឡី១៦៨» ស្ថិតនៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពពីកន្លែងកើតហេតុ បានប្រាប់ឲ្យដឹងថា នៅវេលាយប់រំលងអធ្រាត្រ ថ្ងៃកើតហេតុ បុរសរងគ្រោះបានក្រោកធ្វើការកាប់ជ្រូក លុះក្រោយមកគាត់បានទៅឈរផ្អែកខ្លួន និងជញ្ជាំង ហើយក៏បានប៉ះជាមួយមុខតំណរខ្សែភ្លើង បណ្ដាលឲ្យឆក់ដួលផ្ងារក្រោយ ។
ខណៈនោះ ត្រូវបានក្រុមការងារនៅទីសត្តឃាតនោះ បញ្ជូនទៅកាន់មន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្ស៊ី ដើម្បីសង្គ្រោះ ហើយពេលទៅដល់គ្រូពេទ្យប្រាប់ថា បុរសនោះស្លាប់ហើយ ទើបតម្កល់សពនៅក្នុងមន្ទីរពេទ្យនោះ រង់ចាំដឹកយកទៅធ្វើបុណ្យនៅស្រុកកំណើត ។
ក្រោយកើតហេតុ នគរបាលប៉ុស្តិ៍ដង្កោ រួមជាមួយនគរបាលនៃអធិការដ្ឋានខណ្ឌដង្កោ និងនគរបាលការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ចុះទៅធ្វើកោសល្យវិច្ច័យស.ពនៅមន្ទីរពេទ្យ និងបានចុះទៅពិនិត្យដល់ទីតាំងទីសត្តឃាតដ្ឋានជ្រូកខាងលើ ដើម្បីបញ្ជាក់ពីមូលហេតុឲ្យច្បាស់ថា តើជនរងគ្រគ្រោះស្លាប់ដោយសារតែចរន្តអគ្គិសនីឆក់មែន ឬស្លាប់ដោយមូលអ្វីផ្សេងទៀតក្រៅពីនេះ ៕
