ឧត្តរមានជ័យ ៖ រថយន្ត ALPHARD បើកបរដោយលោកស្នងការរងខេត្តឧត្តរមានជ័យមួយមួយរូបបើកជ្រុលទៅបុករថយន្ត TACOMA កំពុងចតស្ងៀមជាប់ចិញ្ចើមផ្លូវពីក្រោយ ខ្ទាតចូលផ្ទះពលរដ្ឋ បណ្តាលឱ្យស្លាប់អ្នកបើកបរជាលោកស្នងការរង ខេត្តឧត្តរមានជ័យ។
ហេតុការណ៍ខាងលើកើតឡើងកាលពីវេលាម៉ោង៨ព្រឹក ថ្ងៃទី២២ ខែមេសា ឆ្នាំ២០២០២៥ នៅក្នុងភូមិភ្នៀត សង្កាត់សំរោង ក្រុងសំរោង ខេត្តឧត្តរមានជ័យ។
បើតាមសមត្ថកិច្ចបានឱ្យដឹងថា ភាគីខាងរថយន្ត ម៉ាក ALPHARD ពណ៌ខ្មៅ ពាក់ស្លាកលេខ បន្ទាយមានជ័យ 2D-6675 បើកបរដោយលោកវរសេនីយ៍ឯក ឯម សុវណ្ណរ៉ា (ហៅ សុខឆេះ) ជាស្នងការរង នគរបាលខេត្តឧត្តរមានជ័យ លោកបានស្លាប់បន្ទាប់ពីបញ្ជូនទៅមន្ទីរពេទ្យចំណែកភាគីរថយន្ត ម៉ាក TACOMA ពណ៌ស ពាក់ស្លាកលេខ សៀមរាប 2C-3354 ។
បើតាមប្រភពពីប្រជាពលរដ្ឋបានឱ្យដឹងថា មុនកើតហេតុ រថយន្តALPHARD បើកបរដោយលោកស្នងការរង ល្បឿនលឿន ហើយមិនពាក់ខ្សែក្រវ៉ាត់ ពីលិចទៅកើត ដល់ចំណុចកើតហេតុ ជ្រុលបុកពីក្រោយរថយន្ត TACOMA ផ្លោងខ្ទាតចូលផ្ទះប្រជាពលរដ្ឋ រត់ចែកជើងគ្នាព្រាត លោកស្នងការរង ហោះបុកកញ្ចក់រថយន្តរងរបួសធ្ងន់ ហើយបានស្លាប់ បន្ទាប់ពីដឹកបញ្ជូនទៅមន្ទីរពេទ្យបង្អែកខេត្ត។
ជុំវិញករណីខាងលើ សមត្ថកិច្ចកំពុងស៊ើបអង្កេតបន្ថែម ដើម្បីធានាឲ្យមានសុវត្ថិភាពបន្ថែមលើផ្លូវជាតិ និងស្រាវជ្រាវបន្ត៕
