ប៉ៃលិន៖ រថយន្តស្លាកលេខរដ្ឋរបស់មន្ទីរសុខាភិបាលខេត្តប៉ៃលិន ដែលតែងឃើញលោកប្រធានមន្ទីរសុខាភិបាល បើកបរជាប្រចាំនោះត្រូវបានក្មួយប្រុសរបស់លោកបើកទៅបុកម៉ូតូមួយគ្រឿង បានបណ្ដាលឲ្យបុរស់ម្នាក់រងរបួស។
ហេតុការណ៍នេះ បានកើតឡើងនៅរសៀលថ្ងៃទី២៧ ខែឧសភា ឆ្នាំ២០២៥ តាមបណ្តោយផ្លូវជាតិលេខ ៥៧ ចំណុចជិតផ្លូវចូលសាលាបឋមសិក្សាអូរតាពុក ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន។
បើតាមសមត្ថកិច្ចនៅកន្លែងកើតហេតុ បានឱ្យដឹងថា គ្រោះថ្នាក់នេះ បណ្តាលមកពីកត្តាមនុស្សបើកបរខ្វះការប្រុងប្រយ័ត្ន។
អ្នកបើកបរម៉ូតូមានឈ្មោះ ចិត្ត ចាន់ត្រា ភេទប្រុស អាយុ២២ឆ្នាំ មានទីលំនៅភូមិប៉ាហ៉ីជើង សង្កាត់ប៉ៃលិន ក្រុងប៉ៃលិន រងរបួសកំពុងស្ថិតក្រោមការតាមដាន បើកបរម៉ូតូម៉ាក scoopy ពណ៌ស ពាក់ស្លាកលេខ ប៉ៃលិន 1B-4838 រងការខូចខាតធ្ងន់ធ្ងរ។
ចំណែកអ្នកបើកបររថយន្តឈ្មោះ ម៉ាត់ អូស៊ីន ជានិស្សិតអាយុ២៤ឆ្នាំរស់នៅអូរច្រារកើត សង្កាត់ទួលល្វា ក្រុងប៉ៃលិន ខេត្តប៉ៃលិន បើកររថយន្តម៉ាក Mazda ពណ៌ស ពាក់ស្លាកលេខរដ្ឋ 12-2-1718 ត្រូវជាក្មួយលោក ស្លេះ យូ ប្រធានមន្ទីរសុខាភិបាលខេត្តប៉ៃលិន។
គួរបញ្ជាក់ថា បច្ចុប្បន្ន សមត្ថកិច្ចបានយករថយន្ត និងម៉ូតូទៅរក្សាទុកនៅអធិការដ្ឋាននគរបាលក្រុងប៉ៃលិនហើយ ដើម្បីហៅភាគីទាំងសងខាង ចូលខ្លួនមកដោះស្រាយតាមច្បាប់ចរាចរណ៍ផ្លូវគោកនៃព្រះរាជាណាចក្រកម្ពុជា។ ចំណែកឯ អ្នករងរបួសត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យបង្អែកខេត្តប៉ៃលិនផងដែរ៕
