បាត់ដំបង ៖ ក្មេងស្រីអាយុ១១ឆ្នាំម្នាក់បានស្លាប់ និងប្អូនស្រីរបស់នាងអាយុ០៩ឆ្នាំបានរងរបួសស្រាលបន្ទាប់ពីត្រូវអ្នកបើកត្រាក់ទ័រខ្វាក់ភ្នែកបើកបុកពួកនាងពីក្រោយពេលនាងកំពុងជិះកង់ឌុបគ្នានិងស្របទិសគ្នា កាលពីវេលាម៉ោង៣រសៀលថ្ងៃទី២០ ខែឧសភា ឆ្នាំ២០២៥ នៅលើដងផ្លូវមួយកន្លែងស្ថិតក្នុងភូមិអូរប្រយុទ្ធ ឃុំអូររំដួល ស្រុកភ្នំព្រឹក ខេត្តបាត់ដំបង ។
សេចក្ដីរាយការណ៍ដដែលបានឲ្យដឹងទៀតថា ត្រាក់ទ័របានធ្វើដំណើរពីទិសខាងត្បូងទៅខាងជើង លុះដល់ចំណុចកើតហេតុ មិនដឹងយ៉ាងម៉េច បែរទៅបុកពីក្រោយក្មេងស្រី០២នាក់បងប្អូន ដែលកំពុងជិះកង់ឌុបគ្នា ធ្វើឲ្យពួកនាងស្លាប់និងរបួសតែម្ដង ។
បើតាមប្រភពព័ត៌មានបានឲ្យដឹងបន្ថែមថា ត្រាក់ទ័រនោះទំនងទើបបើកចេញពីចម្ការ ដោយមានដឹកធុងបាញ់ថ្នាំខ្នាតធំខាងមុខផង និងខាងក្រោយផង នៅពេលដឹកធុងបាញ់ថ្នាំដ៏ធំ និងមានសម្ភារផ្សេងៗនៅចំខាងមុខតៃកុងបែបនេះ ធ្វើឲ្យតៃកុងពិបាកមើលផ្លូវ ពេលធ្វើដំណើរដូច្នេះហើយទើបមើលមិនឃើញអ្នកជិះកងនៅខាងមុខ ក៏បុកពេញទំហឹងតែម្ដង ។
ក្រោយពេលបុកមនុស្សស្លាប់ និងរបួស អ្នកបើកបរត្រាក់ទ័រខ្វាក់ភ្នែករូបនោះ ក៏ឈប់ហើយចុះដាក់មេប្រូចបាត់ពីកន្លែងកើតហេតុ នៅសល់តែត្រាក់ទ័រទុកឲ្យសមត្ថកិច្ចបើកយកទៅទុកនៅអធិការធ្វើការស្រាវជ្រាវរកមុខជនបង្កឲ្យចូលខ្លួនដោះស្រាយតាមផ្លូវច្បាប់ ៕
