កំពង់ស្ពឺ ៖ កម្មករ កម្មារិនីរោងចក្រប្រមាណ១១នាក់បានដួលសន្លប់ ហើយត្រូវដឹកបញ្ជូនយកទៅសង្គ្រោះព្យបាលភ្លាមៗក្រោយម៉ាស៊ីនខ្យល់នៅក្នុងរោងចក្រដេរកាបូបយីហោ (ម៉ីសែន ហេនប៊ែក) ផ្ទុះធ្លាយជះចំហាយបណ្តាលជះក្លិនពេញរោងចក្រតែម្តង ។
ហេតុការណ៍នេះបានបង្កការភ្ញាក់ផ្អើល កាលពីវេលាម៉ោង១០:៣០នាទីព្រឹកថ្ងៃទី០២ ខែឧសភា ឆ្នាំ២០២៥ នៅចំណុចក្នុងក្រុមហ៊ុនយីហោ មុីសែន ហេនប៊ែក (ដេរកាបូប) ដែលមានទីតាំងស្ថិតនៅក្នុងភូមិស្វាយទាប ឃុំអង្គពពេល ស្រុកគងពិសី ខេត្តកំពង់ស្ពឺ។
សមត្ថកិច្ចនិយាយឱ្យដឹងថា រោងចក្រដេរកាបូបយីហោយ ម៉ីសែន ហេនប៊េក មានកម្មករ កម្មការនីសរុបចំនួន៨៤៣នាក់ ក្នុងនោះ ស្រី៥៥៨នាក់។ នៅពេលកើតហេតុនោះ មានកម្មករសន្លប់១២នាក់ប្រុសម្នាក់ ត្រូវបានរថយន្តដឹកមកសង្គ្រោះនៅមន្ទីរពេទ្យ២៤ម៉ោងដើមអង្គ្រង សង្គ្រោះព្យាបាល។
សមត្ថកិច្ចដដែលបានបន្តថា ក្រោយកើតហេតុអាជ្ញាធរ និងម្ចាស់រោងចក្របានឱ្យកម្មករ កម្មការិនីសម្រាកការងារសិន ។ ដោយមូលហេតុដែលបណ្តាលឱ្យកម្មករ កម្មការិនីរោងចក្រដួលសន្លប់នោះ មកពីខូចម៉ាស៊ីនខ្យល់ ធ្វើឱ្យខ្យល់ចេញច្រាលពេញក្រុមហ៊ុន បណ្តាលឱ្យកម្មកសន្លប់។
ពាក់ព័ន្ធនិងករណីកម្មករ កម្មការិនីរោងចក្រដួលសន្លប់ជាង១០នាក់ខាងលើ លោក ចឹក បូរិន ប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តកំពង់ស្ពឺ បានឱ្យអ្នកយកព័ត៌មានយើងដឹងថា ពិតជាមានករណីកម្មករ កម្មារិនីរោងចក្រដេរកាបូប យីហោ ម៉ីសែន ហេនប៊េក ដួលសន្លប់ចំនួន១២នាក់ ប្រុសម្នាក់ពិតប្រាកដមែន ។
បណ្តាលមកពីផ្ទុះធ្លាយម៉ាស៊ីខ្យល់ហើយធ្វើឱ្យសាយភាយពេញរោងចក្រ បច្ចុប្បន្ន មានស្ថានភាពធូរស្រាល ហើយក្រុមហ៊ុនអោយកម្មករ សំរាកការងារមួយល្ងាចម្សិលមិញ ហើយព្រឹកថ្ងៃទី០៣ ខែឧសភា ឆ្នាំ២០២៥នេះ ចូលបំរើការងារវិញធម្មតា ។ ដោយឡែក កម្មករ កម្មការិនីទាំង១២នាក់ នៅសម្រាកនៅផ្ទះសិន ៕
