ភ្នំពេញ : ប្រទះឃើញសាកសពបុរសម្នាក់ស្លាប់ក្នុងទឹកប្រឡាយសាក់សំពៅ ក្នុងភូមិកំរែង សង្កាត់សាក់សំពៅ ខណ្ឌដង្កោ រាជធានីភ្នំពេញ បង្កការភ្ញាក់ផ្អើលនៅវេលាម៉ោង៩:៥០នាទីយប់ថ្ងៃទី២០ ខែមេសា ឆ្នាំ២០២៥ ។
ប្រភពព័ត៌មានបានបញ្ជាក់ថា ជនរងគ្រោះជិះម៉ូតូមួយគ្រឿងម៉ាក Honda ADV ពាក់ស្លាកលេខភ្នំពេញ 1KY-4937 ទំនងជាជិះលឿនពេកហើយនៅពេលយប់លុះមកដល់ចំណុចផ្លូវកោងក៏ជ្រុលទៅធ្លាក់ទឹកប្រឡាយក្រោយមកក៏មានប្រជាពលរដ្ឋធ្វើដំណើរកាត់ទីនោះក៏ប្រទះឃើញម៉ូតូរបស់ជនរងគ្រោះធ្លាក់ជាប់មាត់ប្រឡាយ ដោយមានការសង្ស័យទើបគេរាយការណ៍ទៅកម្លាំងនគរបាលនៅទីនោះដើម្បីចុះមកពិនិត្យ។
ប្រភពព័ត៌មានបានបន្តថា ក្រោយពេលកម្លាំងនគរបាលបានចុះមកដល់ទីតាំងកើតហេតុនៅព្រឹកថ្ងៃទី២១ ខែមេសា ឆ្នាំ២០២៥ កម្លាំងនគរបាលនៃអធិការដ្ឋាននគរបាលខណ្ឌដង្កោ ក៏បានចុះរាវរកសាកសពបន្ទាប់ពីចុះរាវរកអស់ពេលជាច្រើនម៉ោងមកកម្លាំងនគរបាលក៏បានរកឃើញសាកសពបុរសជនរងគ្រោះខាងលើដែររកឃើញនៅមិនឆ្ងាយប៉ុន្មានពីទីតាំងប្រទះឃើញម៉ូតូរបស់ជនរងគ្រោះ ។
ភ្លាមៗកម្លាំងនគរបាលជំនាញនៃអធិការដ្ឋាននគរបាលខណ្ឌដង្កោមិនទាន់អាចបញ្ជាក់ពីអត្តសញ្ញាណរបស់ជនរងគ្រោះបាននៅឡើយទេដោយកំពុងសហការជាមួយកម្លាំងនគរបាលជំនាញនៃការិយាល័យនគរបាលបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ធ្វើការពិនិត្យលើសាកសពជនរងគ្រោះ និងបើកការស្រាវជ្រាវជុំវិញហេតុការណ៍នេះ ។
