សៀមរាប ៖ នៅវេលាម៉ោង២២និង៥០នាទីថ្ងៃទី១៨ ខែឧសភា ឆ្នាំ២០២៥ មានករណីគ្រោះថ្នាក់ចរាចរណ៍រវាងរថយន្តនិង ម៉ូតូសណ្ដោងរ៉ឺម៉កនិង រថយន្ត ស្ថិតក្នុងភូមិជ្រៃខាងជើង ឃុំកៀនសង្កែ ស្រុកសូទ្រនិគម ខេត្តសៀមរាប លើផ្លូវជាតិលេខ៦ បណ្តាលឱ្យស្លាប់២នាក់ និងរបួសធ្ងន់ ស្រាលចំនួន១១នាក់។
អាជ្ញាធរស្រុកសូទ្រនិគម បានឱ្យដឹងថា រថយន្ត០១គ្រឿង ម៉ាក HYUNDAI ពណ៌ស ប្រភេទដឹកទំនិញ ផ្លាកលេខបាត់ដំបង2C-2517 បើកបរដោយឈ្មោះ លី លន់ ភេទប្រុស អាយុ ៣១ឆ្នាំ រស់នៅភូមិសំរោងកញ្ជោច ឃុំឫស្សីលោក ស្រុកជីក្រែង ខេត្តសៀមរាប បើកបរល្បឿនលឿនទិសដៅពីលិចទៅកើត បានបុកម៉ូតូសណ្ដោងរ៉ឺម៉ក ០១គ្រឿង ម៉ាក Wave ពណ៌ខៀវ ផ្លាកលេខគ្មាន បើកបរដោយឈ្មោះ វុទ្ធ សេរី ពិសិដ្ឋ ភេទប្រុស អាយុ៣២ឆ្នាំ រស់នៅភូមិយាង ឃុំឫស្សីលក ស្រុកជីក្រែង ទិសដៅពីលិចទៅកើត។ហើយរថយន្តម៉ាក HYUNDAI បន្តទៅបុករថយន្ត០១គ្រឿងទៀត ម៉ាក លុចស៊ីស ពណ៌ស ផ្លាកលេខ ភ្នំពេញ2X-6977 បើកបរដោយឈ្មោះ ទូច ពេជ្យ ភេទប្រុស អាយុ៣៩ឆ្នាំ រស់នៅភូមិ ស្ពានតូច ឃុំឫស្សីលោក ស្រុកជីក្រែង ខេត្តសៀមរាប ទិសដៅពីកើតមកលិច មានអ្នករួមដំណើរ០៣នាក់។
អាជ្ញាធរបន្តថា ករណីនេះបណ្តាលឱ្យស្លាប់មនុស្ស០២នាក់ ទី១-ឈ្មោះ ឆេង វ៉ូច ជាអ្នករួមដំណើរលើរថយន្តម៉ាកHYUNDAI ទី២-ឈ្មោះ ហិន លីហួ ជាអ្នករួមដំណើរលើរថយន្តម៉ាក លុចស៊ីស។ ក្នុងនោះរបួសធ្ងន់មនុស្ស០៣នាក់ និងរបួសស្រាលមនុស្ស០៨នាក់។
សមត្ថកិច្ចមូលដ្ឋានបានចុះដល់កន្លែងកើតហេតុ និងវាស់វែងកន្លែងកើតហេតុ រួចបញ្ជូនអ្នករបួសទៅមន្ទីរពេទ្យបង្អែកស្រុកសូទ្រនិគម។ រីឯវត្ថុតាងបានយកមករក្សាទុកនៅអធិការដ្នាននគរបាលស្រុកសូទ្រនិគម ដើម្បីរង់ចាំចាត់ការតាមច្បាប់៕
