បាក់ស្រុតដីកន្លែងដដែលធ្លាក់កង់បីនិងមនុស្ស ចូលប្រឡាយលូ សំណាងល្អមិនមានគ្រោះថ្នាក់

ភ្នំពេញ ៖ ភ្លៀងមួយមេធំ មុននេះបន្តិច បានធ្វើអោយផ្លូវនៅជាប់មាត់ប្រឡាយលូស្ទឹងមានជ័យបាក់ស្រុតម្តងទៀត ដែលផ្លូវមួយនេះកាលពីឆ្នាំមុននៅចំណុចដដែលនេះក៏បានបាស្រុតម្តងរួចមកហើយ ។

ការបាក់ស្រុតនេះ បង្កភ្ញាក់ផ្អើលឡើងនៅវេលាម៉ោង០៤និង៣០នាទីរសៀលថ្ងៃទី២៦ ខែមេសា ឆ្នាំ២០២៥ នៅចំណុចផ្លូវអមមាត់ប្រឡាយលូស្ទឹងមានជ័យ ក្នុងសង្កាត់ស្ទឹងមានជ័យទី២ ខណ្ឌមានជ៏យ រាជធានីភ្នំពេញ ។

ប្រជាពលរដ្ឋរស់នៅទីនោះ បានប្រាប់អោយដឹងថា មុនកើតហេតុមានភ្លៀងធ្លាក់យ៉ាងខ្លាំងហើយលំហូរទឹកលូនៅប្រឡាយស្ទឹងមានជ័យគឺកម្ពស់ទឹកឡើងខ្ពស់។ ស្របពេលនោះ ក៏មានកង់បីឥណ្ឌាមួយគ្រឿងបើកលើផ្លូវមួយខ្សែដែលអមប្រឡាយលូនោះភ្លាមៗពលរដ្ឋបានឃើញព្យាយាមស្រែកប្រាប់ថា «កុំទៅទៀត ប្រយ័ត្នបាក់ស្រុត ដោយសារចំណុចនេះ ទឹកហូរបុកខ្លាំងដូច្នេះកុំទៅទៀតអីរកផ្លូវវាងទៅ» ។

ប្រភពព័ត៍មានពីប្រជាពលរដ្ឋ បានប្រាប់បន្តថា ខណៈនោះ អ្នកកង់បីឥណ្ឌាហាក់ដូចជាមិនខ្វល់សម្តីដែលគេស្រែកប្រាប់ទេ ក៏បន្តទៅមុខទៀតដល់ចំណុចបាក់ស្រាប់តែស្រុតដីក្រឡាប់កង់បី លិចចូលទឹកលូតែម្តង។ ឃើញដូច្នោះ ប្រជាពលរដ្ឋ នាំគ្នាស្ទុះរត់ទៅជួយចងខ្សែនិងជួយទាញកង់បី រួមនឹងមនុស្សឲ្យឡើងមកលើគោកវិញ បានដោយសុវត្ថិភាព មិនបង្កគ្រោះថ្នាក់ឡើយ។ ភ្លាមៗ ប្រជាពលរដ្ឋនាំគ្នារាយការណ៍ជូនអាជ្ញាធរ មានសមត្ថកិច្ចចុះមកអន្តរាគមន៍ ។

បច្ចុប្បន្ន សាលាសង្កាត់ស្ទឹងមានជ័យទី០២ បានចុះដល់ទីតាំងខាងលើ រួចព័ទ្ធខ្សែជាបណ្តោះអាសន្ន រងចាំចំណាត់ការពីថ្នាក់លើផងដែរ ៕